暫時心中的第一名沾麵
我地去嘅時候係冬天(01/2020)，大概5點幾，門口排隊唔算太多人，我地等咗大概30mins就可以入去了。
入邊啲setting同一般日本拉麵舖一樣，都係行嗰啲居家風。一部拉麵機，沾麵套餐有兩款，大致分別都係配菜份量係single定double份量；麵嘅份量base係200g，可以100g、200g咁加，順帶一提，好似係有另外販售女人份量 (150g)；湯就係魚介豚骨湯。座位後面有掛勾俾你掛褸同袋。
點解我地會黎尼間沾麵係因爲我睇IG @alexiswhung 嗰東京拉麵排名，而尼間係第一名，所以就bookmark咗一定要黎尼間。咁就自然會有期待…
一上麵，我就心諗，佢dish presentation真係唔靚 (你諗下隔離麵屋一燈、香港座銀…)。
唔緊要，咁就唯有期待下佢嘅味道。點知食完第一啖，心諗「咩料，咁樣係第一名?」
但礙於現場嘅食野環境十分安靜，加埋心底都係想俾多次機會佢，所以決定食多幾啖，再同Mark哥交換意見。
點知，不得了，越食越好食。
唔係講笑，嗰一刻，佢係我心目中嘅評分係直線上升，跟住我同Mark哥都用驚艷嘅眼神望住對方。事緣太耐之前食嘅，所以冇辦法詳細描述味道，期待之後再訪東京可以補充返。但尼間係目前為止，我同Mark哥都覺得即使湯凍咗，我地都覺得完全唔會減分嘅一間，而尼一點本身就已經係一個加分點。
小趣事：舖頭員工時間安排得好好，每一round都可以清晒成間店嘅客人，可以一round接一round咁入客。但我地兩個人罷咗人地兩round時間嘅位，就係因為Mark哥眼寬肚窄，加到去300g麵，點知越食越慢，食到後尾要我幫手食埋啲麵。
